O deporte é superación pero Os 100 dos International Trekkers é iso e moito máis. Para comezar, trátase da primeira proba de 100 quilómetros de ultra-andaina excursionista que se celebra en Galicia, o que nos dá unha idea (máis que clara) das esixencias de posta punto e tempo libre que se requiren dos participantes: se estendes o percorrido de cada proba, case cruzas o mapa da nosa terra de punto.
Porén, do que se trata (máis que de consumir quilómetros e distancias a eito) é de centrar esforzos nunha área xeográfica concreta, co fin de degustala e enchouparse nela. Igual ca en anteriores edicións, a proba localízase en Barbanza, esta finde que vén, os días 22 e 23 de xuño.
Será un continuo discorrer montañeiro polos principais espazos naturais e paisaxísticos dos sete concellos: Ribeira, A Pobra, Boiro, Rianxo, Porto do Son, Lousame e Noia. A saída será na praza de España de Ribeira e a chegada no pavillón deportivo de Coroso de Ribeira.
Os 100 dos International Trekkers, para quen non o saiba a estas alturas, é unha proba non competitiva de sendeirismo/ultratrail de 100 quilómetros a realizar nun máximo de 24 horas, organizada polo Club Deportivo International Trekkers Barbanza Sar e pertencente á Copa Galega de Andainas da Federación Galega de Montañismo.
O percorrido deste ano terá avituallamentos na praia da Corna, Pobra, Mosquete, Muíño, Cea, Moimenta, A Graña, O Curro, Moldes e o monte de San Alberto, o que nos dá unha idea dos emprazamentos polos que vai discorrer.
Na organización desta rechamante ultra-proba atópase xente como o noiés Xaíño Méndez Froján, que é o director deportivo dos 100 dos International Trekkers. Segundo apuntou os días pasados, co fin de permitir a máxima participación apostouse este ano por un trazado de entrada máis predominantemente chairo (case a primeira metade do percorrido) para logo meter o itinerario en faena (a suba á serra do Barbanza). Nesta convocatoria de 2019 o número de inscritos (número récord) é de 266 camiñantes. A proba seguirá a facer gala dun marcado compromiso medioambiental: non se xerará ningún plástico que poida ficar a pé de camiño.
