A asemblea da formación nacionalista da Pobra do Caramiñal decidiu manter a promesa feita durante a campaña electoral de que “os votos do BNG só servirían para poñer de alcalde a Ramiro Ouviña.” Por iso, non apoiarán a investidura de Nós Pobra nin dos populares. Esta decisión foi tomada despois de que a pasada semana recibiran peticións de reunión por parte dos dous partidos políticos e trasladáronlle a súa determinación nas xuntanzas mantidas este mércores.
Así mesmo, consideran que “as matemáticas do 26M fan innecesario o voto do BNG para o nomeamento de alcalde ao candidato de Nós Pobra, xa que ao non darse unha maioría absoluta, posto que o BNG non vai pactar co PP, sairá electo na segunda ronda por razón de ser a lista máis votada.”
Tamén lles sorprendeu a proposta por parte de Nós Pobra para negociar un acordo de goberno “sen concretar ningunha oferta previa” e “despois de todas as deslealdades de NP cara o BNG durante o anterior mandato.” Aínda así, transmitirán esa “escasa proposta” á asemblea para tomar unha decisión.
Nos comicios municipais celebrados o pasado mes de maio, a lista de Nós Pobra foi a máis votada con 2.019 papeletas alcanzando os 5 concelleiros, seguido do PP que obtivo outros 5 escanos con 1.968 votos. Unhas eleccións nas que o BNG perdeu 663 sufraxios e 1 acta, acadando 2 edís na corporación municipal.