A conselleira do Mar, Rosa Quintana, o patrón maior de Ribeira e presidente da Federación Galega de Confrarías, José Pérez, o seu homólogo de Aguiño-Carreira, José Antonio Santamaría, o alcalde en funcións de Ribeira, Manuel Ruiz, e o presidente da federación provincial, Daniel Formoso, mantiveron unha reunión co obxectivo de aclarar a situación sobre a dragaxe do río Lérez e o punto no que se atopa a súa tramitación, sen prexudicar a actividade da frota.
A titular de Mar expresou durante a xuntanza que é “absolutamente falso” que se estean a verter lodos procedentes do Lérez na illa de Sálvora e desmentiu que Portos de Galicia, o cal depende da Consellería do Mar, teña autorizado o envío dos áridos procedentes da dragaxe a ese punto posto que non ten competencias nin autoridade para facelo. Ademais, incidiu en que o proxecto está nunha fase “moi inicial” e que a dragaxe nin sequera comezou.
Deste xeito, a conselleira quixo lanzar unha mensaxe de tranquilidade aos profesionais da pesca e do marisqueo. “Non sei de onde sae a intranquilidade se non é por moita irresponsabilidade de determinados grupos que semella que o único que queren é trasladar preocupación ao sector dicindo mentiras, afirmou Rosa Quintana.
Así mesmo, insistiu en que os áridos do Lérez son inocuos segundo revelaron as propias análises salientando que “isto estará proximamente a disposición do público en xeral para que o poida ver e contrastar” e tranquilizando ao sector pois “non se fará nada que o prexudique.”
A representante da Xunta trasladoulle ao sector que a única decisión en firme xa tomada é que non se van enviar os áridos da dragaxe a Tambo, na ría de Pontevedra, e que o destino que se elixa non terá incidencia na actividade pesqueira e marisqueira cumprindo a lexislación medioambiental.
Pola súa parte, José Pérez manifestou que o sábado terá lugar un encontro da Federación Galega de Confrarías á que acudirá Rosa Quintana para informar de primeira man ao resto de patróns. Respecto de como o notificarán ao sector do mar dixo que “imos agardar ao sábado, a estar tódolos patróns, para decidir como trasladarlle a noticia” e “iremos tratando o tema máis polo miúdo nas diversas reunións que manteremos co paso do tempo segundo se vaia avanzando neste asunto.”
