O Pazo de Lestrobe, en Dodro, acolleu a semana pasada clausura do Programa Integrado de Emprego 2022/23 que agrupou nesta edición aos concellos de Padrón, Rianxo, Valga, Rois, Pontecesures e Dodro. Como lembraremos, o programa foi co-financiado pola Consellería de Promoción do Emprego e Igualdade da Xunta de Galicia e o Servizo Público de Emprego Estatal (SEPE).
O obxectivo primordial foi “mellorar a empregabilidade de persoas en situación de desemprego dos concellos implicados”. A iniciativa tivo unha marcada vertente dixital. De feito, unha das súas liñas de actuación foi a formación para o desenvolvemento de competencias tecnolóxicas que favoreceran a incorporación ou reincorporación ao mercado laboral.
En segundo lugar traballouse na orientación laboral individualizada ao longo do programa. Para rematar buscouse a intermediación laboral coas empresas da contorna durante os doce meses de duración.
En todos estes procesos investíronse máis de 1.000 horas de cursos, talleres, visitas a empresas, etc.
Xornada de clausura
A xornada de clausura desenvolveuse con un formato de charla coloquio empresarial. Nela participaron o secretario territorial da Xunta de Galicia na Coruña, os alcaldes e a alcaldesa de todos os concellos da agrupación, e o persoal de recursos humanos de compañías colaboradoras co Programa, en concreto, Aluminios Cortizo S.A; Financiera Maderera S.A; SIF Servicios, S.L.; Ana Muñiz S.L., e Pousadas de Compostela S.L..
O representante da Xunta, Severino Álvarez Monteserín. destacou a importancia da implicación, tanto dos concellos como da iniciativa privada, para o éxito destas actuacións. Os rexedores, pola súa banda, puxeron en valor “o esforzo de todas as persoas participantes, así como do persoal do programa” e agradeceron “a colaboración de todas as empresas participantes, un elemento esencial no transcurso do programa”.
Nesta edición atendéronse 107 persoas de todos os Concellos participantes (30 de Padrón, 27 de Rianxo, 14 de Valga, 14 de Dodro, 14 de Pontecesures e 8 de Rois), e logrouse unha porcentaxe de inserción superior ao mínimo esixido (35%), de 40 persoas.
