Este martes 3 de outubro a Asociación de Empresarios de Ribeira inaugurou a terceira edición da iniciativa Camiño da Arte, coa que a patronal ribeirense busca dinamizar o comercio e á vez levar a cultura e a arte ás rúas da cidade e da súa contorna. Nos case 40 establecementos adheridos a esta campaña os clientes e cidadáns en xeral poderán gozar das obras dos 28 artistas e artesáns participantes, todos eles da comarca do Barbanza.
Na inauguración a Asociación de Empresarios agradeceu o traballo realizado pola comisaria da mostra, Mª Goretti Bello, e pola co-comisaria Teresa Ramallo, “grazas ás cales esta iniciativa é finalmente unha realidade”. A patronal lanzou un convite a todos os cidadáns de Barbanza e visitantes a “gozar das diferentes obras expostas nos escaparates dos establecementos participantes”. A inauguración celebrouse este martes pola mañá no local na rúa Rosalía de Castro da Asociación de Empresarios de Ribeira.
