O Concello de Boiro celebrou este mércores unha nova sesión do Consello Escolar Municipal co obxectivo de avaliar propostas e analizar as demandas e necesidades do curso. A sesión estivo presidida pola
concelleira de Educación, María Outeiral; e contou coa representante de inspección educativa, Verónica Martínez Delgado; así como a presenta de representantes do centros, do alumnado e outras entidades que forman parte.
O Consello Escolar Municipal fixo especial fincapé nos problemas do trasporte escolar que se suceden dende o inicio de curso. “Existe unha zonificación aprobada pola Consellería de Educación e Mobilidade denega paradas de transporte deixando a rapaces e rapazas sen o servizo”, afirmaron. No IES Praia Barraña aumentan os casos de rapaces e rapazas matriculadas en bacharelato que non teñen dereito ao transporte escolar e non teñen medios para desprazarse ata o centro educativo. “O Concello tívose que facer cargo do transporte de nenos e nenas da ensinanza obrigatoria”.
Outro dos temas que se trataron no Consello Escolar Municipal foi a solicitude de ciclos de FP. “Levamos a Educación a proposta de ciclos formativos acordes cos principais sectores produtivos da comarca, como son a acuicultura e a hostalaría, sen ter ningunha resposta ao respecto”.
No caso do ciclo formativo en hostalaría, o Concello de Boiro puxo a disposición da Xunta de Galicia as instalacións coas que conta no Centro de Formación e Viveiro de Empresas de Espiñeira e, para solicita a formación en acuicultura, contouse coas demandas e apreciacións do sector bateeiro, que acreditaron a necesidade dunha formación regrada na zona.
Na sesión valorouse moi positivamente o desenvolvemento do proxecto En(clave) que se levou a cabo durante este curso nos distintos centros educativos e tratáronse propostas para levar a cabo durante o
próximo curso. Os centros educativos trasladaron a necesidade de, para o vindeiro curso, incidir nas dúas problemáticas máis demandadas polos docentes e que son a saúde mental e a saúde sexual.
O Consello Escolar Municipal do Concello de Boiro reúnese de xeito periódico durante o curso escolar para detectar e dar solución aos problemas e necesidades xurdidos no ámbito educativo. Este órgano, no
que está representada toda a comunidade educativa do municipio, está en condición de ofrecer unhas perspectivas de interese xeral que axuden a clarificar e resolver aquelas problemáticas detectadas no eido escolar.
