Con motivo do Día Internacional das Persoas con Diversidade Funcional, o 3 de decembro, a Asociación AMBAR desenvolveu numerosas actividades ao longo desta semana na comarca. Entre elas, hoxe tivo lugar no pobrense Elma a presentación do Calendario Solidario 2020, evento no cal interviñeron o alcalde da Pobra, Xosé Lois Piñeiro; a presidenta de AMBAR, Milagros Rey; e o fotógrafo e realizador do calendario, Víctor Manuel Martínez Campos ‘Pichero’. A continuación, proxectouse un vídeo de todo o proceso de traballo, desde a caracterización previa á realización das propias fotos. Ademais, procedeuse á entrega duns galardóns a tódalas persoas participantes.
Esta edición está dedicada integramente ao cine español e os filmes escolleitos foron Quien a hierro mata, Bajo el mismo techo, Los Japón, Dolor y gloria, Viaje al cuarto de una madre, Elisa y Marcela, Viva la vida, Gente que viene y bah, El Olivo, La librería, Que se mueran los feos e A pesar de todo.
O calendario poñerase á venta o 5 de decembro, podendo reservarse a través do enderezo electrónico correo@asociacionambar.org ou do teléfono de contacto 981874480, así como no Centro de Recursos de Ribeira da Asociación AMBAR, a Oficina de AMBAR na Pobra do Caramiñal e a Academia Yara. O calendario de parede ten un custe de 5 euros e o de sobremesa de 3 euros. Os fondos recadados irán destinados a financiar proxectos para promocionar o empoderamento e inclusión das persoas con diversidade funcional.
