O Concello de Outes informou este luns 10 de abril do restablecemento do servizo de auga logo da ruptura que se produciu nas xornadas anteriores na avenida de Fisterra. Dende o Consistorio engaden que “nos vindeiros días continuarán os labores de reparación” e, ademais, “farase unha avaliación global das avarías e problemas producidos estes días pasados”.
A avaría, como lembraremos, afectou ás vivendas situadas na avenida de Fisterra e a outras zonas da Serra de Arriba.
Sinalar que esta non foi a única incidencia relacionada co subministro de auga no concello e que na recta final da Semana Santa foi rexistrada unha avaría previa na Serra de Arriba, cuxo arranxo resultou de tal complexidade que se fixo preciso acometer unha solución provisional e precaria que garantise un servizo mínimo. O sábado foi restablecido finalmente o servizo na Serra de Arriba.
Previamente tamén se rexistraron problemas de subministro en Mosteiro e Vilariño.
