Un operario perdeu a vida no concello pontevedrés do Grove ao precipitarse dunha altura de cinco metros mentres trataba de poñer unha antena, no lugar de Campos, á altura do número 35.
Segundo a información facilitada ao 112 Galicia polo alertador, o electricista caeu cando realizaba o seu traballo preto das 11:30 horas da mañá de hoxe.
Axiña, os xestores do Centro Integrado de Atención ás Emerxencias (CIAE) 112 Galicia solicitaron a intervención do persoal de Urxencias Sanitarias de Galicia-061, que nada puido facer por salvarlle a vida.
Ademais, os xestores do CIAE 112 Galicia puxeron a situación en coñecemento da Garda Civil, da Policía Local e dos membros de Protección Civil do Grove. Arestora, as forzas da orde tratan de aclarar as circunstancias do suceso.
