O Parlamento Europeo acollerá na súa sede de Bruxelas o Foro “O sector turístico dinamizador dunha recuperación sostible”.
Será o vindeiro martes día 29 cando se celebre esta xornada monográfica na que intervirán expertos das institucións europeas e dos países máis relevantes no mundo da viaxe, e responsables das asociacións e empresas privadas.
O encontro, dirixido por Alberto Barciela, membro da Mesa do Turismo de España, contará coa participación de István Ujhelyi, Vicepresidente da Comisión de Transportes e Turismo do Parlamento Europeo; Marie-Helene Pradines, Head of Unit da dirección Xeral de Mercado Interior da Comisión Europea; José Antonio Barrionuevo, Director de Planificación Estratéxica e finanzas de Iberia; Juan Molas, Presidente da Mesa de Turismo, e José Luis Yzuel, Presidente da Asociación de Hostaleiros de España, e Jesús González Mateos de PRESTOMEDIA, entre outros.
No Foro abordaranse aspectos relativos ao ámbito da viaxe, valorando a transversalidade do mesmo para a economía. Será relevante a análise das prioridades sobre os que as Institucións europeas traballan, tales como a transición ecolóxica e a transformación dixital, social e cohesión territorial, e I+D.
No encontro incidirase na necesidade de lograr unha política turística común na UE, da importancia dos Fondos Next Generation para a recuperación e transformación do sector, á vez que se dará visibilidade a iniciativas e exemplos de éxito.
As diferentes mesas redondas que se desenvolverán na xornada serán: “Transición turística para liderar unha recuperación intelixente”; “Sustentabilidade e dixitalización: claves europeas na recuperación do turismo”; “Formación e investigación aplicada para o turismo do futuro”; e “Turismo desde o local”.
O sector turístico é a primeira industria de moitos dos 27 países da UE, incluída España.
