A Xunta apoia a 15 axencias de viaxe das comarcas de Santiago, Barbanza e Costa da Morte para axudar ao desenvolvemento das súas actividades

O delegado da Xunta na Coruña, Gonzalo Trenor, visitou a axencia de viaxe Trotta unha das beneficarias da orde de  axudas, en réxime de concorrencia non competitiva, destinadas ás axencias de viaxe co obxectivo de contribuír ao desenvolvemento da súa actividade. Estes apoios contaron cun orzamento de 650.000 euros para toda Galicia. Concretamente, nas comarcas de Santiago, Barbanza e Costa da Morte foron beneficiarias 15 axencias deste tipo que recibiron en total máis de 110.000 euros para axudar ao desenvolvemento das súas actividades.

Trenor explicou que esta orde tivo como obxecto seguir prestando axuda a un colectivo fundamental no conxunto das empresas de servizos turísticos, xa que as axencias de viaxe son instrumentos imprescindibles para a comercialización de Galicia como destino turístico, visibilizando toda a oferta turística a través do seu labor profesional.

Esta orde foi dirixida a todas as axencias de viaxe, que teñan un centro de traballo na comunidade galega e estivesen inscritas no Rexistro de Empresas e Actividades Turísticas da Xunta de Galicia.

Nas bases consideráronse gastos subvencionables todos aqueles comprendidos entre o 1 de xaneiro de 2022 e o 30 de outubro de 2022 como os gastos derivados da creación do produto e/ou comercialización do destino Galicia e gastos derivados da transformación dixital, cun importe máximo de subvención do 100 % do gasto subvencionable.