O Coworking da Pobra do Caramiñal recibiu este luns 7 de novembro a visita dun grupo de alumnas de alumnos do IES Espiñeira de Boiro, concretamente das rapazas e rapaces que cursan o ciclo superior de Administración e Finanzas. A visita foi unha xornada de emprendemento onde os estudantes tiveron ocasión de coñecer de primeira man as instalacións do espazo de traballo colaborativo e da Casa da Mocidade, ademais dos recursos que pon a Administración local ao dispor das persoas que desexen crear a súa propia empresa.
Xunto con Fátima Rodríguez, encargada da asistencia técnica, compartiron experiencias e ideas de negocio, ademais de coñecer as vinculadas ao Coworking pobrense.
Dáselles así continuidade ás xornadas que organiza periodicamente a Concellaría da Promoción Económica, da cal é titular a edil Charo Varela (Nós Pobra), como, por exemplo, o campus de emprendemento con perspectiva de xénero que tivo lugar no mes de xuño.
Esta visita atópase adscrita ás Aulas de Emprendemento do IES Espiñeira a través dunha axuda da Xunta de Galicia dirixida aos centros educativos para estimular o espírito emprendedor entre o alumnado.
Creado en 2017, o Coworking da Pobra consta dunha área de 143’23 metros cadrados con capacidade para acoller 10 iniciativas emprendedoras: o espazo Emprende, con cabida para 8 módulos de traballo e destinado preferentemente a persoas emprendedoras que desexen crea-la súa propia empresa, e o espazo Nómades, con 2 módulos dirixido a persoas usuarias externas que non permanezan de xeito continuado no centro. Ademais, en 2022 formalizouse a súa integración na Rede Provincial de Espazos de Traballo Colaborativo.
