Outes será un dos sete concellos de Galicia que redactará un Plan Municipal para a Implementación dos Obxectivos de Desenvolvemento Sustentábel (ODS) co apoio do Fondo Galego de Cooperación e Solidariedade. Ademais de Outes tamén foron seleccionados A Guarda, As Pontes, Guitiriz, Nigrán, Verín e Viveiro.
Segundo informou o Concello, a realización deste plan “permitirá facer unha diagnose sobre a situación actual do municipio con respecto á súa contribución e aliñamento cos ODS e á Axenda 2030, tanto a nivel de estratexias municipais, como de aplicación real a medio e longo prazo”. Esta diagnose inicial servirá como “guía e referencia á hora de elaborar o Plan Municipal de Implementación dos ODS, e unha serie de accións de comunicación e sensibilización aos colectivos sociais e á cidadanía en xeral”, engadiron fontes do Consistorio.
Segundo explicou o alcalde, Manuel González, “a idea é recoller información relevante e promover a colaboración e interese desde o comezo polo que a metodoloxía de traballo será eminentemente participativa”. González López detallou que “se realizarán entrevistas tanto ao persoal técnico municipal como a entidades e asociacións do municipio”. A idea, engadiu, é “que tanto as administracións públicas como as organizacións sociais poidan incorporar o Plan de Acción resultante dos estudos feitos”.
O rexedor outense asegura que se farán tamén unha serie de vídeos explicando proxectos en desenvolvemento e unha xoranda final que permita sensibilizar aos axentes municipais sobre a necesidade de cumprir coa Axenda 2030. “Buscamos que o documento sexa unha ferramenta útil e aplicable a medio e longo prazo marcando metas e obxectivos concretos para acadar unha sociedade máis sostible e preservar o planeta para as xeracións futuras”, concluíu.,
—
