O vídeo de Fado para Samuel, a canción composta polo intérprete Davide Salvado e polo produtor Daniel Pardo logo do asasinato homófobo de Samuel Luiz en xullo de 2021, na Coruña, xa pode verse desde nas canles de Youtube e Facebook da Deputación da Coruña e na web seresentir.gal.
Dirixida por Adriana Romero, con produción e letra de Pardo, voz de Salvado e música de Ricardo Pons (guitarra), Marco Quaresma (guitarra portuguesa) e Cibrán Seixo (violín, viola e moog), a peza é outra das propostas e recursos de Liberdade de ser e sentir, a campaña online e offline que, por quinto ano seguido, a área de Igualdade provincial impulsa en colaboración con concellos e entidades da provincia para sensibilizar sobre a importancia da tolerancia e a igualdade das persoas, con independencia da súa orientación sexual e identidade de xénero.
A letra do tema (Salvado e Seixo interpretaron no acto institucional que Igualdade da Deputación organizou o 28 de xuño, Día da Diversidade) é “un berro contra a LGTBQIfobia, as agresións e os asasinatos”, en palabras do seus autores.
O vídeo está gravado na Barbearia Veneza de Porto, de máis de 90 anos de antigüidade. “Creo que o feito de escoller unha barbería”, explica Daniel Pardo, “ten tamén moito que ver con falar dalgunha maneira do concepto de masculinidade e co desexo de mostrar outras masculinidades, outros xéneros, e a fluidez de xénero, que é o tema principal do do vídeo”.
Ademais do vídeo que se presenta este 7 de xullo, Liberade de ser e sentir volve apostar este ano, desde finais de xuño ata a segunda quincena de xullo, por ofrecer actividades para públicos de todas a idades, desde os obradoiros infantís, xogos de pistas para a mocidade e palestras para o adultos. Achega, ademais, “ferramentas e materiais para utilizar durante todo o ano e sumar miradas inclusivas para avanzar nunha sociedade máis tolerante e igualitaria”, explica a responsable de Igualdade da Deputación, María Muíño. A programación da campaña pode consultarse na web seresentir.gal.
