O pasado 11 de xuño celebrouse a quinta edición do Festival Son´s en Aguiño de música e canto tradicional.
A cita foi no Conservatorio de Aguiño, o pasado sábado 11 de xuño, organizada pola Asociación Francisco Lorenzo Mariño no marco do Xuño da Cultura e as Artes do Concello de Ribeira e coa participación dos grupos As 7 linguas de Aguiño e da propia entidade, Bailadela de Ribeira e Chorimas de Queiruga (Porto de Son).
No transcurso do festival, a presidenta da dita asociación, Elvira Pisos, e a concelleira de Aguiño, Ana Barreiro fixeron entrega duns agasallos conmemorativos (unhas pombas musicais de Regal con praquiña) e unhas libretiñas ás nenas participantes.
O evento comezou ás 21 h, rematou ás 22 h con moita afluencia de público (sobre unhas 200 persoas) e despois houbo un ágape gratuíto para todos os asistentes rematando cunha foliada libre onde se achegaron máis músicos participantes con gaitas, pandeiretas, acordeóns, estendéndose a troula musical até máis alá da medianoite. Houbo petiscos, bebidas, viños e unha queimada que preparou a asociación (foi feita por Francisco Pouso e Juanma González).
As responsábeis do acto foron as directivas da entidade: Moncha, Teruca e Carmen Sampedro, Josefa Suárez, Sara Reiriz, Pilar Millet e Elvira Pisos, que tamén presentou o acto.
