O abeiro do seu marco de traballo conxunto a prol da inserción laboral, a integración e a diversidade, o Servizo de Orientación e Emprego da Asociación Amicos e o Concello da Pobra do Caramiñal achegarán á veciñanza varios programas focalizados en mellorar a empregabilidade. Os detalles dos cursos foron dados a coñecer polo alcalde, Xosé Lois Piñeiro (Nós Pobra), e Miguel Beiro, responsábel da Área de Emprego/Empresas de Amicos.
As iniciativas activas a día de hoxe son os itinerarios de inserción socio-laboral para vítimas de violencia de xénero; o proxecto Máis Emprego para persoas con discapacidade; o Programa Integrado de Emprego; e o servizo de orientación a persoas con discapacidade. “Mais este abano poderá ampliarse con futuras accións”, sinalaron, engadindo que “a meta de todos eles é favorecer o acceso ao mercado laboral e proporcionar formación que redunde nunha mellora da competitividade dos e das participantes”.
Amicos desprazarase ata o municipio para prestar os referidos servizos, polo que a Administración local cede un espazo situado no andar baixo da Casa da Mocidade mediante un convenio, lugar que empregarán varios días por semana.
