O departamento de Cultura da Deputación da Coruña destina este exercicio 125.000 euros para apoiar a distribución, comercialización e exhibición audiovisual en lingua galega na provincia. A entidade provincial fai saber que o prazo de presentación de solicitudes rematará o 31 de maio e o importe máximo por beneficiario é de 30.000 €.
Esta liña de axudas cubre o apoio aos contidos audiovisuais galegos (longametraxes, curtametraxes, documentais, etc. feitas en Galicia) para a súa distribución e exhibición en lingua galega (VO, VOSG ou dobraxe ao galego) e tamén o apoio á distribución en lingua galega (VO, VOSG ou dobraxe ao galego) de contidos audiovisuais non galegos (longametraxes, curtametraxes, documentais, etc. feitas fóra de Galicia).
“O campo audiovisual”, salienta o responsábel provincial de Cultura, Xurxo Couto, “é hoxe en día un ámbito estratéxico na creación de contidos culturais para calquera sociedade. A produción de filmes, documentais, contidos dixitais e demais formatos audiovisuais para a súa emisión nas diferentes canles existentes é unha mostra principal da vitalidade dunha lingua e dunha cultura, en tanto permite xerar discurso propio cara si e cara os outros e articular un espazo de referencias propio e recoñecible, cunha dinámica autónoma e beneficiosa no sociocultural e no económico”.
En 2021 a Deputación achegou 96.352,67 euros para que oito filmes puidesen chegar ao público na provincia; entre eles, A virxe roxa, de Marcos Nine; Nación, de Margarita Ledo; ou Negro púrpura, de Sabela Iglesias e Adriana P. Villanueva.
As bases da convocatoria poden consultarse online.
