O Concello de Outes, a través da Axencia de Desenvolvemento Local, informou do desenvolvemento de varias frontes abertas para a promoción da cebola e o ceboliño de San Cosme, dous produtos típicos con gran gran tradición e que contan con gran recoñecemento gastronómico pola súa calidade e sabor. A Feira do San Marcos de Noia, celebrada esta pasada fin de semana, foi o punto de venda e distribución de milleiros de plantas.
A promoción da cebola e ceboliño de San Cosme enmárcase dentro do proxecto Saberes e Sabores de Outes, no que o Concello recoñece que leva varios meses traballando, incluíndo estudos sobre a situación actual do sector primario máis vencellado á agricultura e ás granxas extensivas, así como á tradición dos artesáns e artesás.
O obxectivo é “propoñer estratexias de promoción e dinamización, económicas, sociais e culturais, con vistas a revalorizar e recuperar os recursos tradicionais existentes no concello e, tamén, promover novas iniciativas vinculadas a este sector”.
