Este xoves 7 de abril recalou na Pobra do Caramiñal a exposición sobre o histórico filme galego O bosque animado, baseado no libro de Wenceslao Fernández Flórez, que impulsa a Deputación da Coruña e que chega á localidade da nosa comarca coa colaboración da Concellaría da Normalización Lingüística.
Con esta mostra celébrase o vinte aniversario da estrea do filme, que tivo lugar no 3 de agosto de 2001 na Coruña. A longametraxe é como dixemos unha adaptación libre da novela homónima de Wenceslao Fernández Flórez e eríxese como a primeira película de animación integramente en 3D producida fóra dos Estados Unidos e feita en galego por parte de Dygra Films.
A exhibición componse dunha serie de paneis con debuxos e textos explicativos sobre o proceso de elaboración desta cinta e materiais orixinais. As visitas pódense efectuar na Casa Mariñeira, situada na contorna do parque do Castelo, ata o 28 de abril, de luns a venres, dende as 09.30 ata as 14.30 horas. Ademais, no Xoves e Venres Santo (días 14 e 15) habilítase o horario de 10.00 a 14.30 e de 17.30 a 19.30 horas; así como no Sábado e Domingo de Pascua (días 16 e 17), de 10.00 a 14.30 horas.
Ao acto de inauguración asistiron o alcalde, Xosé Lois Piñeiro (Nós Pobra); o concelleiro da Normalización Lingüística, Xabier Santos (BNG); o deputado provincial Xosé Penas; e o director do filme, Manolo Gómez; así como membros da Corporación municipal e veciñanza que se quixo achegar.
Posteriormente, o Teatro Cine Elma foi escenario da proxección do referido filme, a cal contou coa presenza dun dos directores da cinta, Manolo Gómez, quen, ao longo da mañá, tamén impartiu formación sobre a produción, a ilustración da natureza e o cine a alumnado de centros educativos da Pobra e de Ribeira.
