20191008 O grupo galego Xarope Tulú vai estar a vindeira semana en Rianxo, na Biblioteca Municipal, para ofrecer unha sesión de contacontos sobre o bo de sermos diversos e sobre a importancia de respectar, igualmente, as diferenzas, diversidades e características propias dos demais. Trátase do espectáculo Estrafalaria, que tamén se distingue da norma imperante en varios dos seus aspectos, comezando polo formato adoptado (trátase dun espectáculo que combina a narración oral coa manipulación de obxectos onde o público participa activamente do relato) e rematando pola historia que se conta (o día a día dunhas personaxes que levan a diferenza por bandeira).
O contactos virá da man de Atenea García e está programado para o día 18 de outubro a partir das 18.00 horas. Está recomendado para crianzas a partir dos tres anos.
Segundo informa Xarope Tulú sobre a importancia de sensibilizar á rapazada acerca de todo o amplo abano de realidades persoais coas que van ter que convivir, “as cativas e os cativos deben entender a diversidade como algo enriquecedor e imprescindíbel para que a sociedade evolucione cara o mundo que queremos, ese no que debería predominar a tolerancia, a solidariedade e a integración”.
Organiza o Concello de Rianxo ao abeiro do programa autonómico Ler Conta Moito.
