Este venres 17 as persoas integrantes da comunidade Amicos bótanse ao monte en Leiro, Rianxo, para repoboar con especies arbóreas autóctonas o terreo das contornas das Mámoas. Será a partir das 12.30 horas. Amais de diversos representantes do equipo coordinador de Amicos, asistirán á xeira de traballo Santiago Barros Fernández, xefe de Servizo de Montes de A Coruña, Adolfo Muíños Sánchez, alcalde de Rianxo, e Ánxela Miguéns, presidenta da CMVMC de Leiro. Os traballos a desenvolver inclúen unha superficie de dez hectáreas na devandita parroquia rianxeira, co obxectivo de celebrar o Día Internacional dos Bosques, que se conmemora a nivel mundial o vindeiro luns, 21 de marzo.
Nun plano máis específico, un dos obxectivos principais da xornada do venres é “poñer en valor a contorna das Mámoas do Campiño e recuperar o terreo danado no gran incendio do 25 e 26 de marzo de 2019, que arrasou Dodro e Rianxo”.
Esta acción forma parte do proxecto Amicos ZeroCO2 co que a asociación axuda a restablecer a masa forestal dos terreos para empregar o CO2 que absorben as árbores plantadas para compensar as emisións dos vehículos de Amicos, necesarios para os desprazamentos das persoas con discapacidade as súas casas.
