Tres vehículos, un camión que transportaba penso e dous turismos, víronse implicados nunha colisión na AC-302, ao paso pola Pobra do Caramiñal.Como consecuencia do impacto, dúas persoas necesitaron asistencia médica, polo que foron evacuadas ao centro hospitalario de referencia con lesións de diversa consideración.
Segundo a información recollida no 112 Galicia, o sinistro produciuse pasadas as sete desta mañá, tal e como indicaron as testemuñas do suceso que marcaron o número único de emerxencias para pedir axuda. Así, os xestores do Centro Integrado de Atención ás Emerxencias de Galicia avisaron aos profesionais de Urxencias Sanitarias-061 e aos axentes da Policía Local.
Tamén foron informados os Bombeiros de Ribeira, que acudiron ao lugar do accidente para colaborar nas tarefas de limpeza e retirada dos danos provocados polo choque, xa que os feridos estaban perfectamente liberados e accesibles. Ademais, contaron co apoio dos voluntarios de Protección Civil da localidade.
