O Concello da Pobra, a través da área de Cultura, celebrouse este venres 4 o sorteo dos 50 agasallos que depara o xogo-concurso As Sete Rosalías a todas as crianzas que superaran os retos que se propuñan. A recompensa consistiu na entrega de cadansúa botella térmica serigrafada.
A Concellaría da Cultura da Pobra do Caramiñal volveu apostar por esta actividade con motivo do Día de Rosalía de Castro, que se conmemora no 23 de febreiro, debido á acollida que tivo o ano pasado, ademais de “que constitúe unha maneira de achegarlles ás crianzas a figura da intelectual galega dun xeito didáctico e cun compoñente lúdico, dirixida, concretamente, ao alumnado dos colexios Salustiano Rey Eiras e Pilar Maestú Sierra”, explicaron este venres a edil da Cultura, Patricia Lojo (PSdeG-PSOE), e a técnica municipal desta área, Fita Sanisidro.
Segundo fixeron saber, o formato foi o mesmo có da anterior edición: consistiu en atopar varias siluetas recortadas coa forma de Galicia que contiñan no seu interior o rostro de Rosalía acompañado de versos seus e puideron participar todos aqueles nenos e nenas pobrenses con idades comprendidas entre os 6 e 12 anos que contasen cun dos impresos repartidos. As pezas estiveron expostas nos escaparates de diversos establecementos da localidade dende o día 11 ata o día 25 de febreiro.
O desafío residía en buscar as 7 versións diferentes da imaxe que ilustraba o cartel que promovía a efeméride e, unha vez atopadas, anotar no folleto cal era esa diferenza e en que instalación se situaba. De superar o reto, debíanse entregar os impresos debidamente cubertos cos datos requiridos nos centros de ensino xa mencionados.
