A Orquestra Sons vai celebrar este domingo 19 de decembro un concerto na Igrexa Parroquial de Santa Uxía. O evento, que levará por título Os sons de Nadal, dará comezo a partir das 19 horas.
O espectáculo, de entrada libre e gratuíta, foi presentado este xoves 9 de decembro por Álex Millet e Begoña Campaña (director e integrante deste grupo que ten a súa base en Aguiño,) xunto coa conselleira de de Cultura María Sampedro, quen animou a que os veciños tomen nota “desta proposta tan atractiva”.
Millet avanzou que o repertorio do evento “será totalmente novo” e que “se van incorporar novos instrumentos nunca antes mesturados na traxectoria desta orquestra de pulso e púa, como a percusión, un contrabaixo ou un piano de cola, etc…”. Para o devandito, dixo, contarán con músicos invitados que acudirán de moitas partes de Galicia.
Begoña Campaña explicou pola súa parte que ademais de música haberá un espectáculo de luces e que levan tres meses traballando moi duro e coa maior ilusión. “Será un espectáculo novidoso, atractivo e máxico”, comentou.
Dado que o aforo é limitado, tamén será retransmitido en directo por Youtube e a través de Canal Barbanza.
