A ruta comeza esta fin de semana en Rianxo con 9 establecementos adheridos e continuará nas seguintes fins de semana en Boiro, A Pobra do Caramiñal e Ribeira
Esta mañá realizouse no establecemento A Lareira de Rianxo a presentación da sétima edición da ruta de tapas de Barbanza Arousa. Na mesma participaron Fátima Cachafeiro, xerente da Mancomunidade Barbanza Arousa; Adolfo Muiños, presidente da Mancomunidade e alcalde de Rianxo; Patricia Lojo, concelleira de Cultura e Relacións Institucionais da Pobra do Caramiñal; María José Sampedro, tenente alcalde de Ribeira e Carlos Rodríguez, concelleiro de turismo de Boiro. Tamén estiveron presentes Suso Santamaría, adxudicatario do proxecto e representantes das
3 adegas da IXP Terras do Barbanza e Iria.
Con esta actuación, na que participan máis de 40 establecementos de todo o destino, preténdese dar un pulo importante á gastronomía do territorio e tamén ao viño da Indicación Xeográfica Protexida.
“O grande apoio do sector hostaleiro participando deste tipo de iniciativas fortalece a unión do sector público e o sector privado” resaltou Fátima Cachafeiro.
Este ano iníciase a Ruta de Tapas en Rianxo esta fin de semana e continúa de forma ordenada polos catro concellos: Boiro, A Pobra do Caramiñal e Ribeira.
Na pasada edición introducíronse como novidades a tapa para levar e tamén a votación telemática no marco da época Covid-19. Estes elementos tiveron moi boa acollida polo que este ano mantéñense.
Adolfo Muiños, presidente da Mancomunidade resaltou a colaboración coa hostalería a través desta Ruta de Tapas e tamén a través da iniciativa “Conserva A Orixe”, que este ano foi a primeira edición. Ambas iniciativas están dirixidas a poñer en valor os produtos gastronómicos do destino, potencial moi grande diferencia e especializa a comarca.
