O candidato á Secretaría Xeral do PSdeG-PSOE, Valentín González Formoso mantivo un encontro esta mañá coa militancia de Boiro, Noia, Ames e Oroso onde reivindicou un PSdeG “forte e unido, que non renuncie a gobernar en Galicia”. Neste sentido, Formoso replicou a Gonzalo Caballero que “o noso obxectivo non é gañarlle ao BNG, é gañarlle ao PP e despois cambiar Galicia” e engadiu que “precisamos á fronte do PSdeG a un Secretario Xeral que non renuncie a gobernar no país”.
“Os compañeiros e compañeiras comparten que o PSdeG ten que ser unha forza que ilusione á militancia, que estea ao carón da xente e, como fixo noutros tempos, volva a ter criterio sobre asuntos de país e non se limite a sinalar problemas senón tamén a aportar solucións. É dicir, facendo un socialismo útil para a sociedade porque esa é a nosa forma de ser e a nosa forma de gobernar”, afirmou.
González Formoso cre que “a cidadanía sabe observar perfectamente a aqueles que estamos nas institucións por cambiar a vida das persoas porque non son as palabras as que hai ter en conta, senón os feitos cos que xestionamos as administracións nas que gobernamos, onde a protección social dos máis desfavorecidos, a reactivación económica e a social, o fomento da cultura, da lingua e da igualdade son os piares fundamentais”.
