O Concello da Pobra informou do inicio da cuarta edición de Camiños de Coñecemento e Experiencia, ciclo para persoas maiores de de 50 anos impulsado pola Universidade de Santiago en colaboración coa Concellería de Cultura que dirixe Patricia Lojo (PSOE). Un total de 28 veciñas e veciños participan dende a tarde do 22 de setembro nas actividades de formación do programa.
O primeiro dos coloquios desenvolveuse na tarde deste 22 de setembro da man de Pedro Pablo Campo Díaz, que introduciu ás persoas participantes nos segredos do sistema solar e da Vía Láctea. Regresará no día 24 con José Ramón González Vidal para unha observación astronómica nocturna.
José Manuel Vázquez Lijó impartirá neste día 23 o seminario Revisando a historia dende unha perspectiva local: o patrimonio industrial e as memorias da experiencia laboral no estudo da modernización das vilas costeiras de Galicia nos séculos XIX e XX, que se complementará no día 30 cunha visita ao Museo ANFACO da Conserva, en Vigo.
E no día 27 será a quenda de Laura Touriñán Morandeira con Marcial del Adalid y Gurrea (1826-1881). Un capítulo único da nosa Historia de Galicia e da nosa Historia da Música Clásica Galega que terá continuidade na xornada seguinte.
Os temas a abordar constan dunha sesión práctica e outra teórica, transcorrendo esta última no Auditorio do Museo Valle-Inclán.
