20190911. O cuarto ciclo de Camiños de coñecemento e experiencia achegará formación universitaria a maiores de 50 anos na Pobra do Caramiñal. Este proxecto de democratización do coñecemento conta cun amplo programa. Deste xeito, o xoves, 19 de setembro, terá lugar o seminario teórico-práctico (I): Matemáticas, pídechas o corpo! a cargo de Beatriz Álvarez Díaz, Laura Davila Pena e Érika Diz Pita, todas elas da facultade de Matemáticas da Universidade de Santiago de Compostela (USC). Volverán o xoves, 26 de setembro, coa segunda parte deste seminario.
O martes, 24 de setembro, será a quenda de Xaime Manuel Requeixo Souto, da facultade de Dereito (USC), co coloquio A herdanza: sucesión por causa de morte segundo o dereito galego e o estatal, celebrándose o martes, 1 de outubro, a parte práctica.
O venres, 4 de outubro, chega Xeografía física da costa galega e modos de adaptación do ser humano. Orixe, evolución e orixinalidade do noso litoral da man de Juan López Bedoya, da facultade de Xeografía e Historia (USC). Esta cita terá continuidade na xornada do venres, 11 de outubro, cun percorrido pola costa do concello pobrense.
Álvaro Dosil Rosende, do Grupo de Investigación 3ª Xeración e Bolseiro da Oficina de Desenvolvemento Sostible (USC), será o encargado de pechar esta edición o luns, 21 de outubro, coa conferencia O Cine como Linguaxe que proseguirá o martes, 22 de outubro, coa súa parte práctica.
Tódalas actividades se desenvolverán en horario de 16.30 a 18.00 horas na aula de estudo da Biblioteca municipal Victoriano García Martí, situada no terceiro andar do número 25 da rúa Castelao. A matrícula é gratuíta e os interesados poden formalizala na Casa da Cultura Raquel Fernández Soler, así como solicitar máis información se o precisan.
