Na Pobra a cultura prosegue a pleno rendemento nesta segunda quincena de agosto. Os espectáculos para público familiar que integran o programa do Verán Cultural teñen continuidade no 19 de agosto con O mega aniversario… co cal La Guagua quere dar as grazas a toda a rapazada por ser todo un exemplo neste tempo marcado pola COVID-19. Transcorrerá a partir das 20.30 horas, no Cantón da Leña, e as prazas cubriranse por orde de chegada ata cubrir a cabida.
Ademais, Educateatro trasladará no 21 ás rúas, a partir das 18.00 horas, o seu Paseo Xurásico: un divertido itinerario protagonizado por un xigante Tiranosauro Rex corpóreo e dúas crías de Triceratops e Velociraptor que sorprenderá a todas as persoas viandantes, acompañados dun alegre paleontólogo que interactuará con todos eles. A dita programación está organizada pola Concellaría da Cultura da Pobra do Caramiñal, da cal é titular a edil Patricia Lojo (PSdeG-PSOE), en colaboración coa Rede Cultural da Deputación da Coruña.
Así mesmo, o programa Cultura no Camiño da Xunta de Galicia achegará no día 20, ás 21.00 horas, a animación de rúa Troula Animación: Funky Party na que, un par de zancudos, ao ritmo de música disco dos 80, non pararán de bailar e animar aos presentes a que se unan á súa funky-party móbil.
