Volve o ciclo Paisaxes Sonoras logo dunha primeira edición de éxito, o verán pasado, cando a Mancomunidade Barbanza Arousa reivindicou as nosas paisaxes máis emblemáticas a través da música e a cultura. O programa regresa con feitura de festival de tres días de duración. Na primeira convocatoria Guadi Galego, Carlos Blanco, The Soul Brothers e Triángulo de Amor Bizarro puxeron en valor coas súas contribucións artísticas espazos tan singulares como a punta do Castro (Ribeira), o Pazo de Rianxiño, a punta de Cabío (A Pobra) e a praia da Pesqueira (Cabo de Cruz, Boiro).
Agora, os concellos de Rianxo, Boiro, A Pobra e Ribeira queren dar ao ciclo un extra de impulso, apostando novamente polas potencialidades do territorio a visitantes e poboación comarcal mediante “un formato innovador”. Un formato, explica a mancomunidade, “no que a natureza é o escenario principal converténdose na protagonista absoluta da creación artística”.
Nesta segunda edición, Paisaxes Sonoras consolídase ofertando tres xornadas consecutivas durante
os días 27, 28 e 29 de agosto apostando por unha programación con artistas galegas, e nas que a lingua a empregar é un 100% o galego.
Esta cita cultural dará comezo cos Heredeiros da Crus o venres 27 de agosto ás 20.00h na praia do Esteiro (Cabo de Cruz). Xa na xornada do sábado, o ciclo trasládase a Rianxo coas Tanxugueiras nunha sesión vermú que terá lugar no peirao de Taragoña e á tarde, ás 20.00h con Mercedes Peón na punta de Cabío (A Pobra do Caramiñal). O peche do festival, realizarase na Fábrica de Salazón (Ribeira) coa actuación de Baiuca, que actuará por vez primeira na comarca do Barbanza.
As entradas aos concertos saen á venta este xoves, o público interesado poderá mercar un número moi limitado de abonos polo prezo de 40 € máis gastos de xestión ou entradas individuais desde 10 € máis gastos de xestión.
Este ano, reforzando o compromiso co territorio, a Mancomunidade Barbanza – Arousa implicouse ás catro concellerías de cultura dos concellos de A Pobra do Caramiñal, Boiro, Rianxo e Ribeira e de entidades locais como son Teatro Airiños, o historiador Manuel Gago e as cantareiras boirense de Lumieira, que formarán parte dun programa específico que terá como eixo principal a paisaxe da comarca e que se comunicará nos vindeiros días.
