20190906. O furtivismo é un problema que afecta a toda a costa de Galicia, e os municipios de Arousa Norte non son unha excepción. No caso de Rianxo, o patrón maior, Miguel Ángel Iglesias, puxo este asunto sobre a mesa na Xunta Local de Seguridade celebrada no Concello o pasado martes, 3 de setembro. Miguel Ángel Iglesias agradeceu o labor que están desenvolvendo a Policía Local e a Garda Civil, “incluso con vixilancias eles de por si.” Así mesmo, trasladou a necesidade de intensificar o control do marisqueo ilegal “porque estamos desbordados a día de hoxe.”
O patrón maior indica que o furtivismo ocasiona grandes perdas pois “nós contamos con douscentos quilos mínimo, que che rouban máis, a unha media de cinco euros, xa son mil euros en cada marea.” Ademais, precisa que abunda a extracción de “ameixa xapónica, fina, babosa… O problema é que collen tanto a que da a talla coma a que non da”, repercutindo no futuro porque impiden que medren os exemplares pequenos.
No que respecta ao coñecido como ‘furtivismo de bañador’, sinala que “non notamos moitas persoas nos areais facendo iso”, pero aínda así “hai xente e ao cabo do verán son moitos quilos.”
