A conselleira do Mar, Rosa Quintana, visitou hoxe as obras que está a realizar a firma Frigonor ColdStore no Polígono da Tomada da Pobra do Caramiñal e destacou “a necesidade de contar con instalacións que, coma esta, busquen o aforro enerxético e que conten con procesos máis eficientes e responsábeis na protección do medio ambiente”. Ademais, a conselleira sinalou que “o Goberno galego promove este tipo de actuacións a través das axudas a pemes de transformación de produtos do mar” e explicou que “no marco destas achegas a Xunta aprobou un apoio de 7 millóns de euros para este proxecto da nave de Frigonor ColdStore, que prevé crear máis de 30 empregos directos na súa contorna”.
A futura instalación, que ocupará unha superficie de máis de 8.000 metros cadrados e contará cunha altura de 12 metros, incluirá dúas plantas para a elaboración, dúas cámaras de almacenamento en conxelación a -45ºC e a -20ºC e unha zona para operacións loxísticas e de clasificación con acceso a oito peiraos de carga e descarga. Tamén disporá dun espazo para oficinas e instalacións laborais, ademais de aplicar novos procesos e sistemas de xestión en aras de impulsar a seguridade laboral.
En concreto, esta zona destinaranse á manipulación, transformación, conservación e almacenamento frigorífico de especies pesqueiras como o atún, o atún vermello, o gambón arxentino e a lura procedente do caladoiro das Malvinas.
Con todo, cómpre mencionar que o sector pesqueiro conseguiu numerosas axudas ao largo do ano. De feito, neste momento está aberto o prazo de presentación de solicitudes (ata o 28 de xullo) co que a Xunta subvencionará ata o 50% das perdas de facturación rexistradas nas empresas, sempre e cando estas sexan polo menos dun 20% en relación cos ingresos medios para o mesmo período nos tres anos anteriores -2017, 2018 e 2019. No caso de empresas con menos de tres anos, deberán ter actividade durante polo menos o ano natural 2019 completo e o cálculo realizarase tendo en conta ese exercicio.
