O escritor compostelán Suso de Toro, un dos grandes das nosas letras, estará o vindeiro 21 de maio en Rianxo para presentar o seu novo libro, Un señor elegante (Editorial Xerais). Xunto co autor, participarán no acto Xosé Luís Axeitos Agrelo (profesor e académico da RAG) e Adolfo Muíños Sánchez (alcalde de Rianxo). A apertura e o peche musical do acto, previsto para as 20.30 horas na Sala Arcos Moldes do Auditorio, correrá a cargo de Iago Hermo. Segundo informou o Concello, esta presentación forma parte do programa dos Actos Castelao 2021 pero tivo que ser adiada por mor da situación sanitaria.
Un señor elegante é unha novela de non ficción na que o autor achega o perfil dunha respectada familia de cirurxiáns con orixe en Padrón e asentada en Rianxo e en Compostela, unha familia de ideoloxía republicana e vencellada ao galeguismo desde o século XIX. A través dese retrato familiar, Suso de Toro vai enfiando a historia de Galicia e de España durante o século XX: o golpe do 36, a Guerra Civil, o exilio, a represión e a loita clandestina. O protagonista é Ramón Baltar, cirurxián distinguido polo réxime franquista e axente clandestino a través da Unión de Intelectuais vencellada ao Partido Comunista.
Entrada de balde
A entrada de balde. Só con reserva previa de localidades entre os días 12 e 20 de maio, a través de formulario na web do Concello (preferente), ou no telf 981 100 688. É necesario indicar, de todas as persoas para quen se solicita: nome completo, telf e se son conviventes. A reserva será efectiva unicamente cando se confirme desde o auditorio.
