Co gallo da celebración internacional do Día da Terra, este 22 de abril, a Asociación Ambar puxo un pequeno vídeo nas redes para ilustrar, a través da experiencia formativa de Nati, un anaco do seu día a día en materia de xardinería e e horticultura. Tanto no vídeo como na información que o acompaña a entidade inclusiva da nosa comarca pon o foco na importancia de levar a cabo actividades que sexan respectuosas co medio e sustentábeis: “Apostar por unha agricultura ecolóxica ou consumir produtos locais de km 0 son só algúns dos moitos cambios que podemos facer”. Segundo engade a asociación “en Ambar xa estamos comprometidas cunha cultura eco e pouco a pouco estamos desprendéndonos dos plásticos”.
