O Concello de Outes publicou un bando no que informa das disposicións que se van adoptar estes días no termo municipal, ao abeiro das novas restricións decretadas pola Xunta para frear, nestes vindeiros quince días, o espallamento da COVID-19. Segundo recorda o Concello á cidadanía, suspenderanse as actividades presenciais de carácter deportivo, de ocio e de tempo libre organizadas polo Goberno local.
Tamén pechan ao público todas as instalacións deportivas (o Complexo Deportivo Municipal e a Piscina, os pavillóns da Serra e de Cruceiro de Roo, o Campo de Fútbol do Cunchido, o Centro Náutico do Freixo, as pistas polideportivas exteriores, etc), agás para a práctica do deporte que dependa da Federación Española.
Amais, pechan a Casa da Cultura e a Biblioteca (agás para clases de apoio a estudantes e ensaios de compañías profesionais) e todos os locais sociais municipais, e suspéndense os mercadiños e feiras.
