O Concello de Rianxo achegou un comunicado sobre a celebración do primeiro de novembro, Día de Tódolos Santos, e as disposicións previstas para garantir a seguridade sanitaria e maila orde emitida pola Consellería de Sanidade esta mesma semana (unha orde que restrinxe as reunións de persoas a un máximo de cinco). Segundo fixo saber o Goberno local, os cemiterios do termo municipal ficarán abertos na devandita data, aínda que esta apertura virá acompañada de estritas medidas de seguridade que garantan o cumprimento da nova orde de Sanidade: será obrigatorio o uso de máscaras, limitaranse as reunións a un máximo de 5 persoas (agás convivintes), manterase o distanciamento e restrinxirase o aforamento dos camposantos a un máximo de 50 persoas.
O Concello tamén fixo saber que a xornada festiva virá acompañada dun dispositivo especial para a vixilancia e control, no que tamén participará o corpo de Protección Civil de Rianxo. O Goberno local aproveitou o comunicado para lembrar á veciñanza e aos visitantes a necesidade de respectar as medidas de seguridade e colaborar, deste xeito, a pór freo ao espallamento da pandemia.
