A Escola de Música de Rianxo abriu pasado luns 22 de xuño o prazo para formalizar a pre-matrícula do seguinte curso, o curso 2020-2021. O período para formalizar este procedemento previo á matrícula rematará este venres 3 de xullo, incluído. As persoas interesadas poden obter máis información a través do correo electrónico escolademusicaderianxo@gmail.com ou ben mediante o número de teléfono (con opción de Whatsapp) 671 058 555.
O vindeiro curso da Escola de Música de Rianxo virá cunha serie de novidades de interese para as futuras e futuros alumnas/os. Por exemplo, o programa formativo incluirá un módulo de acordeón que será impartido por Sabela Galbán, outro sobre produción musical e novas tecnoloxías que virá da man de Adrián Saavedra, outro curso sobre violín impartido por Patricia Túñez e, tamén, unha actividade formativa coa guitarra que virá da man de Narci Fernández.
