
A estas alturas do período democrático en España aínda hai gobernantes que confunden as súas obrigas públicas e institucionais coas políticas partidistas. Pérdense entre a institucionalidade e o partidismo. O Estado somos todos e por tanto cada gobernante, con indpendencia da súa formación política ou ideoloxía, ten que gobernar para todos e non unicamente para os seus simpatizantes ou afiliados.
Uns claros exemplos, máis próximos a nós, son nas diferentes administracións locais do Barbanza, de diferentes signos políticos. Segundo a cor política así actúa a Xunta de Galicia (Partido Popular) e a Deputación Provincial (Partido Socialista) no momento de outorgar axudas, subvencións ou proxectar investimentos importantes, en moitos ocasións sen ter en consideración a urxencia ou a necesidade das actuacións para realizar. Estamos a falar de diñeiro público, de todos, que tería que investirse de maneira equitativa e xusta.
Por outra banda, non podemos esquecernos das visitas institucionais que se realizan por parte dos directores xerais, conselleiros ou deputados provinciais aos diferentes Concellos. Lembremos que, por exemplo en Ribeira, mentres estivo gobernando o tripartito foron escasas ou case nulas as visitas institucionais por parte dos gobernantes da Xunta de Galicia e cando se achegaban á cidade centenaria unicamente reuníanse cos membros do Partido Popular e iso non é de recibo nin nada exemplar para calquera Administración Pública que se prece.



