Monseñor Francisco José Prieto presidiu a eucaristía dominical e fixo un chamamento á proximidade veciñal, á solidariedade e ao acompañamento mutuo no seo da parroquia.
A comunidade parroquial de Santa Baia do Araño, no concello de Rianxo, acolleu este sábado a visita pastoral do arcebispo de Santiago de Compostela, monseñor Francisco José Prieto Fernández. O encontro inscríbese no itinerario habitual de visitas que o prelado compostelán vén desenvolvendo polas distintas parroquias da diocese co obxectivo de compartir os actos litúrxicos e manter un contacto directo coa realidade cotiá dos fieis.
Monseñor Prieto estivo á fronte da celebración da eucaristía, na que comezou manifestando a súa satisfacción por achegarse ata o Araño e puxo en valor o papel dos veciños e das familias que manteñen viva a actividade comunitaria, chamando aos asistentes a agradecer este espazo de convivencia compartida.
Acollida, proximidade e coherencia na vida diaria
Partindo do pasaxe evanxélico da parábola do banquete de vodas, o arcebispo incidiu en que a chamada de Deus abrangue a todos sen distincións, require dunha resposta libre e persoal, e non debe quedar restrinxida unicamente aos espazos de culto, senón proxectarse nas preocupacións, obrigas e decisións de cada xornada.
Neste senso, Prieto puxo un énfase especial na necesidade de combater as divisións e prexuízos sociais, convidando a achegarse aos fogares e á situación real dos veciños, en particular daqueles que sofren dificultades. Segundo subliñou, xestos cotiáns como preguntar «como estás?» ou «que precisas?» resultan esenciais para xerar espazos reais de escoita e apoio mutuo.
Ao fío da alegoría do traxe de festa citado no Evanxeo, o prelado avogou por unha fe crible e coherente que se traduza en actitudes visibles de solidariedade e compromiso. Tomando como peche as palabras de san Paulo sobre a xestión da abundancia e a escaseza, o arcebispo instou á veciñanza do Araño a manterse unida, apoiarse ante as adversidades e coidar que ningunha persoa se sinta soa no ámbito parroquial.
