- A alcaldesa trasladou ao presidente da Deputación da Coruña a necesidade de mellorar a DP-7303 en Oleiros e de calmar o tráfico en contornas escolares.
- Ambas as dúas administracións reafirmaron o seu compromiso co vial de conexión ao novo polígono industrial.
A alcaldesa de Ribeira, María Sampedro, mantivo este xoves unha reunión de traballo co presidente da Deputación da Coruña, Valentín González Formoso, co obxectivo de analizar os proxectos executados no municipio a través do Plan de Obras e Servizos (POS) e coordinar novas intervencións prioritarias en infraestruturas viarias e equipamentos públicos.
Durante o encontro, a rexedora puxo sobre a mesa a necesidade urxente de actuar na estrada provincial DP-7303, ao seu paso pola parroquia de Oleiros. A actuación proxectada contempla a instalación dunha rede de recollida de augas pluviais e a ampliación da vía, unha intervención que se adaptará e desenvolverá por fases para optimizar a súa execución.
Na axenda de traballo incluíronse tamén medidas orientadas á seguridade viaria, especialmente o calmado de tráfico nas inmediacións de centros educativos como o IES Leliadoura ou no tramo que une Castiñeiras con Aguiño. De igual xeito, avaliáronse diversas propostas para o acondicionamento de instalacións deportivas e ratificouse o compromiso provincial co vial de enlace ao novo polígono industrial, un eixo estratéxico para o desenvolvemento económico local.
María Sampedro subliñou que o traballo conxunto entre administracións resulta fundamental para dar resposta ás demandas veciñais e optimizar os fondos destinados a servizos esenciais como saneamento, abastecemento e pavimentación: “As persoas deben estar sempre no centro das políticas, independentemente dos partidos que ostenten o mando nas diferentes administracións. Este goberno sempre traballará man a man coas diferentes institucións na procura do progreso de Ribeira”, salientou a mandataria.
Tras a xuntanza institucional, Sampedro e González Formoso desprazáronse ata a parroquia de Artes para supervisar sobre o terreo as obras de pavimentación recentemente rematadas na DP-7304, traballos orientados a mellorar as condicións de seguridade e comodidade da circulación na zona.
