Prisión provisional para os dous presuntos xefes dunha rede de tráfico de drogas desmantelada en Ribeira
Un operativo conxunto da Garda Civil e a Policía Nacional saldouse coa desarticulación dun grupo criminal dedicado ao narcotráfico con base na parroquia ribeirense de Palmeira. A intervención rematou con cinco persoas detidas como presuntas autoras de delitos de tráfico de drogas e pertenza a organización criminal; tras pasar a disposición xudicial, dous dos arrestados, sinalados como os líderes da trama, ingresaron en prisión provisional.
A investigación, desenvolvida de forma coordinada pola Comandancia da Garda Civil da Coruña e a Udyco da Comisaría da Policía Nacional de Ribeira, tivo a súa orixe meses atrás a raíz da neutralización previa dun punto de compravenda que abastecía de heroína a pequenos distribuidores da comarca do Barbanza. As pescudas levaron aos axentes a fixar a vixilancia sobre un inmoble de Palmeira onde se constatou unha actividade continuada e unha afluencia constante de compradores, consolidándose como un dos focos de distribución máis concorridos da zona.
Segundo informaron os corpos de seguridade, a rede recibía cocaína e heroína para posteriormente manipulalas e cortalas na vivenda co obxectivo de incrementar os beneficios económicos.
O pasado 17 de setembro levouse a cabo o despregamento operativo con rexistros simultáneos en dous domicilios. Debido ao perfil violento atribuído aos membros da trama —a quen previamente se lles requisaran dúas armas de fogo—, o dispositivo contou coa intervención de unidades tácticas especiais e guías caninos.
Nos rexistros os axentes incautaron máis de 200 gramos de cocaína e heroína, máis de 1.000 euros en diñeiro en efectivo fraccionado e dous vehículos que figuraban como subtraídos, os cales circulaban con matrículas dobradas e manipuladas para sortear a vixilancia policial.
Tanto os detidos como as dilixencias foron postos a disposición do Tribunal de Instancia de Garda de Ribeira. O xuíz decretou o ingreso en prisión provisional e comunicada para os dous supostos cabezas da organización, mentres que os outros tres investigados quedaron en liberdade con medidas cautelares vinculados á causa.
