O Goberno municipal de Ribeira continúa traballando na execución do PAI-EDIL que pon o foco no barrio de Bandourrío. O investimento público será de 10.912.880 euros, que asumirá nun 60% a Unión Europea a través do Fondo Europeo de Desenvolvemento Rexional (FEDER).
O Concello informou que a semana pasada comezaron os traballos do estudo xeotécnico e campaña inicial de recoñecemento do terreo con especial atención á viabilidade técnica do futuro aparcamento disuasorio subterráneo. O dito estudo ten carácter previo e “servirá”, en palabras do Concello, “como documento técnico de apoio para a toma de decisións iniciais, a definición da imaxe obxectivo, a programación operativa da actuación e a preparación da futura licitación do proxecto técnico”.
O ámbito de actuación deste xeotécnico é a praza de Pontevedra, a contorna do antigo Auditorio, a área prevista para o aparcamento disuasorio subterráneo, o borde de conexión co parque de Pedra Pateira, as zonas de posíbel implantación de ramplas ou accesos e a contorna inmediata afectada por futuras escavacións, contencións ou cambios de rasante. Trátase, polo tanto, de “coñecer polo miúdo o estado do terreo para a construción do estacionamento subterráneo e que o deseño vaia en consonancia co proxecto que se ten contemplado para Bandourrío de espazo diáfano, homoxéneo e conectado co mar”.
Topográfico e plan director operativo
Os seguintes pasos a dar serán o estudo topográfico e o plan director para que a infraestrutura proposta conte cos servizos necesarios como subministro eléctrico, abastecemento e saneamento e tendo en conta a realidade actual e levar tódolos datos extraídos aos planos de cara a redacción do proxecto que saia a licitación.
Busca de co-financiamento para a PAI-EDIL
A alcaldesa de Ribeira, María Sampedro, salientou a busca de co-financiamento que se fará dende o Concello para, nas súas palabras, “un proxecto estratéxico e rexenerador do barrio de Bandourrío”. De feito, dixo, este tema abordarase no pleno ordinario do mes de setembro no que se debaterá a aprobación da solicitude de acceso a liña de préstamos sen intereses a favor dos concellos de Galicia para o financiamento da achega municipal correspondente aos PAI-EDIL.
Esta solicitude tradúcese en 2 millóns de euros que axuden a sufragar o co-financiamento dun proxecto estratéxico para o municipio ribeirense, “tanto na súa dimensión urbanística como económica e social, coa vantaxe do gran aforro que supón o importe de xuros para as arcas municipais”, sinalou a rexedora.
