O Concello de Ribeira recibiu unha delegación de catro profesionais do International Learners Directorate (ILD) de Malta, organismo gobernamental especializado na atención educativa e inclusión de persoas e familias migrantes. A visita, enmarcada nunha mobilidade Erasmus+ de observación profesional
(job shadowing) impulsada polo equipo directivo do IES Leliadoura, co seu director Ismael Arnoso á fronte, permitiu presentar á delegación maltesa a realidade social do municipio e o traballo que se desenvolve desde os Servizos Sociais municipais.
A alcaldesa, María Sampedro, subliñou “a importancia de compartir experiencias con outros territorios europeos para seguir avanzando nas políticas de acollida e inclusión”. Seguindo este fío, destacou o labor dos Servizos Sociais municipais e o traballo en rede que se desenvolve desde o Concello para acompañar as persoas e familias migrantes no seu proceso de integración.
Durante a xornada, representantes municipais e persoal técnico de Servizos Sociais compartiron coa delegación os principais retos relacionados coa diversidade cultural e a inclusión social, así como os protocolos municipais de primeira atención, asesoramento e empadroamento e o traballo de acompañamento a familias, menores e persoas en situación de vulnerabilidade.
O encontro serviu tamén para poñer en valor a coordinación entre a Administración local, os centros educativos e o tecido asociativo, así como para intercambiar experiencias sobre os procesos de acollida e integración da poboación migrante. Entre os temas abordados estiveron a aprendizaxe lingüística, a inclusión educativa e social, a conciliación e o acceso á formación e ao emprego.
A iniciativa permite establecer un intercambio de boas prácticas entre o modelo maltés e a realidade galega, ao tempo que contribúe a fortalecer os vínculos internacionais do municipio e a explorar futuras vías de colaboración e cooperación europea.
A visita forma parte do programa de internacionalización do IES Leliadoura, centro acreditado Erasmus+, e está coordinada polo seu equipo directivo, encabezado polo director Ismael Arnoso, e pola coordinadora Erasmus+, Josefa Hermo.
