Ao longo deste ano 2026 o Concello da Pobra do Caramiñal levou a cabo diferentes actuacións de mantemento e mellora no campo de fútbol de Cadreche, cun investimento total de 35.741,65 euros. As ditas intervencións permiten acondicionar a instalación e reforzar os seus equipamentos de cara ao comezo da nova tempada deportiva.
Indo aos traballos desenvolvidos, cómpre salientar a construción dun novo vestiario, cun importe de 12.152,76 euros. A esta actuación súmanse 6.993,80 euros encamiñados a armarios e 4.735,94 euros á pintura de vestiarios e baños.
Asemade, a relación de investimentos inclúe tamén: a subministración dunha bomba de rego, por 4.280,98 euros; un termo, por 2.645,06 euros; unha portería de fútbol 8 trasladábel e a súa montaxe, por 1.904,96 euros; a reparación das varandas das bancadas, por 1.331 euros; o mantemento do céspede artificial, por 1.163,54 euros; redes de fútbol 7 e a súa colocación, por 533,61 euros.
Pola súa banda, o alcalde e concelleiro de Deportes, José Carlos Vidal, salienta que “dispoñer dunhas instalacións en boas condicións é fundamental para fomentar a práctica deportiva e dar resposta ás necesidades dos clubs e das persoas usuarias”.
Para rematar, Vidal fai fincapé na importancia da actividade deportiva para o municipio e no compromiso de continuar avanzando na adecuación das infraestruturas: “Queremos que a veciñanza conte con espazos axeitados para practicar deporte e que os clubs poidan desenvolver a súa actividade nas mellores condicións posíbeis”.
