O Concello de Boiro propón para o seu debate e aprobación no pleno ordinario da Corporación deste xoves a participación municipal no POS+ adicional 2026 da Deputación da Coruña. A cantidade designada ao Concello é de 954.642,25 euros, que se vai investir en dous proxectos de obras.
Por unha banda o Concello propón o proxecto de ampliación das salas fitness no Complexo Deportivo da Cachada, unha actuación dun importe de 455.542,92 euros coa que se pretende ampliar a instalación de maneira que dea cabida a tres novas salas para a práctica de deporte e tamén a dotación de gradas na parte da piscina.
O outro proxecto que se pretende executar é o de renovación do céspede de herba artificial e mellora da cuberta das gradas no Campo de Fútbol de Vista Alegre. Esta actuación ascende aos 362.998,26 euros e ten como finalidade renovar o céspede do campo máis antigo da instalación que presenta unha situación de desgaste e deterioro debido ao paso dos anos.
O importe restante da suma deses proxectos, 136.101,07 euros, destinarase ao gasto corrente. A aprobación da participación do Concello de Boiro con estes proxectos no POS+ adicional 2026 da Deputación da Coruña debaterase este xoves no Pleno ordinario do mes de setembro que se celebra ás 20.00 horas.
