A eurodeputada do BNG, Ana Miranda, denunciou no pleno de Estrasburgo do Parlamento Europeo as problemáticas do sector marisqueiro galego, que son, dixo, “graves, estruturais e conxunturais”. Nas súas palabras, o sector vive “unha situación crítica que demanda medidas e solucións ante a pasividade da Xunta”, unha situación que empeorou este 2026 coas abundantes choivas a comezos de ano que provocaron grandes arrastres de area e bivalvos nas rías galegas e baixaron a salinidade das augas provocando, en consecuencia, un aumento da mortalidade do marisco. Ao devandito, dixo, sumouse un verán con altas temperaturas na auga do mar, que reduciron o afloramento e, polo tanto, o marisco, agravaron aínda máis a situación do sector
“A miña intervencións no Parlamento Europeo denunciou a invisibilidade que ten o sector pesqueiro e marisqueiros nestes momentos, abandonado polo Goberno do Partido Popular. Tanto o sector a pé como a flote sofre rendas baixísimas e en moitos casos sen cobrar dende hai meses”, sinalou, engadindo que “o sector marisqueiro de Galiza sofre tamén problemas estruturais como son os peches continuados dos bancos”.
De feito, dixo, “no último ano tamén se perderon o 17% das licencias para mariscar”. Mentres, criticou, “as axudas europeas e do Estado tardan en chegar aos centos de mulleres e homes que traballan no sector”..
A actual situación do sector lembra ao fatídico 2023 cando os temporais provocaron que no seguinte exercicio as ventas de peixe e marisco nas lonxas caesen en 24.000 toneladas, a facturación descendese un 7,5%, 30 millóns menos, e se perdesen preto de 220 empregos, comentou a eurodeputada.
Miranda trasladou ás institucións europeas varias medidas de urxencia coas que garantir a viabilidade do sector, deseñadas conxuntamente e en colaboración cos centros de investigación e as universidades galegas. Apuntou que o BNG defende un estudo sobre as causas da baixa produtividade, un protocolo de baleirado e limpeza dos encoros para reducir a salinidade das rías, segundo as necesidades do sector e non a axenda das grandes eléctricas para se enriquecer xogando co prezo da electricidade.
Ana Miranda solicitou tamén “dar prioridade ao sector na distribución do Fondo Europeo Marítimo, de Pesca e da Acuicultura”, o FEMPA, porque “a situación de urxencia exixe medidas a nivel galego e europeo para a viabilidade do sector en momentos de baixa produtividade. Por suposto demandamos que nos vindeiros orzamentos europeos haxa partidas específicas para paliar as consecuencias que están sufrindo tantas mariscadoras e mariscadores”.
