A Consellería de Medio Ambiente puxo en valor este 3 de setembro os resultados acadados ata o momento no marco do Plan de conservación da píllara das dunas, que, segundo indicou a conselleira Ángeles Vázquez, “permitiu recuperar de forma progresiva na costa galega a poboación desta especie vulnerábel ata chegar ás 93 parellas reprodutoras en 25 praias, a cifra máis alta rexistrada desde a posta en marcha desta iniciativa no ano 2014”.
Así o destacou en Santiago a conselleira, quen participou, acompañada pola delegada territorial da Xunta na Coruña, Belén do Campo, na clausura da xornada de peche do proxecto IBERALEX, no que se enmarca precisamente o programa autonómico de conservación da píllara.
Indicou que “a tendencia positiva detectada na poboación desta especie”, tal e como explicou a responsable autonómica, “tamén foi posíbel grazas á aposta que fixo a Xunta no ano 2017 por un programa para a conservación e cría ex-situ —é dicir, fóra do seu hábitat natural— destas aves”. Engadiu que desde entón “logrouse que voaran con éxito un total de 178 polos incubados de forma artificial e posteriormente criados nos centros de recuperación de fauna autonómicos que ten a Xunta en Oleiros e Cotobade”.
Cómpre lembrar que IBERALEX é un proxecto europeo para mellorar a conservación da píllara das dunas como ferramenta que permita avanzar na compatibilidade dos usos humanos e da biodiversidade no espazo transfronteirizo formado por Galicia e Portugal, que suma uns 2.600 quilómetros de costa e máis dun milleiros de praia e humidais.
Cun orzamento global de 1,9 millóns de euros, cofinanciado ao 75% con fondos europeos FEDER, o obxectivo co que naceu este proxecto (que rematará o vindeiro 30 de setembro) era dar un paso máis no compromiso con esta especie e na conservación das praias e zonas húmidas ibéricas a través da execución dunha serie de medidas e accións nas que colaboran a Xunta, a Universidade de Santiago de Compostela (USC) e outras institucións académicas e conservacionistas de España e Portugal, cun total de sete socios.
