O Concello de Muros consolida o seu Servizo Municipal de Madrugadores nos centros educativos no curso escolar 2026/27. Neste comezo da actividade escolar, hai inscritos 18 nenos e nenas no CEIP Plurilingüe de Louro (12 familias); 32 nenos/as no CEIP Plurilingüe Ricardo Tobío (27 familias), e 12 nenos e nenas no CEIP Ramón de Artaza y Malvárez (10 familias). En total, 49 familias e 62 nenos e nenas.
O Concello de Muros asumiu por completo a xestión do servizo no verán de 2024, dando resposta ás necesidades das familias e da comunidade educativa. Antes, no curso 2023/24, colaborou coas ANPA durante uns meses para manter un servizo que utilizaban 20 nenos e nenas.
“É unha satisfacción ver que esta medida para impulsar a conciliación se consolida”, sinalou María Lago, alcaldesa de Muros, engadindo que “se trata dunha prioridade para nós, un servizo municipal e financiado ao 100% polo concello que permite fixar poboación en Muros”.
“Desde o concello consensuamos de forma continua coas familias usuarias e os centros melloras no servizo para que facilite de forma efectiva a conciliación e ninguén quede fora”, apuntou Laura Rivadeneira, concelleira de Ensino de Muros, sinalando que “a consolidación deste servizo demostra a súa utilidade e a resposta que ofrece ás necesidades reais das familias de Muros”.
Pola súa banda, a concelleira de Igualdade, Maruxa Martínez, lembrou que “a conciliación é un elemento fundamental para avanzar cara a unha sociedade máis igualitaria, facilitando que as responsabilidades de coidado poidan compatibilizarse coa vida laboral e persoal”.
“Coidar da veciñanza de Muros con medidas que realmente melloran a súa vida diaria, como este servizo de Madrugadores, é o piar da nosa acción de goberno”, rematou María Lago.
