Nos vindeiros días, no marco das Festas da Guadalupe 2026, a Corporación de Rianxo celebrará un pleno extraordinario para conceder a Ramón Iglesias Sánchez (Rianxo, 1938), Moncho “O Xixí”, a Medalla de Ouro de Rianxo.
Trátase dun distintivo honorífico recollido no regulamento de honras e distincións do Consistorio aprobado no 1995 e que se concederá por vez primeira este ano para recoñecer “a traxectoria dunha persoa sen igual e que dedicou parte da súa vida a traballar, de maneira desinteresada, por Rianxo”, segundo se informa na proposta da Corporación, na que se engade que “dende a humildade e dende diferentes entidades, Moncho traballou por algo que cada día merece menos atención, o ben común e o fortalecemento dos lazos que fan comunidade”.
O homenaxeado foi presidente do C.D. Unión e do Liceo Marítimo, entre outras ocupacións, mais a súa vida está ligada á organización das Festas da Guadalupe. De feito, estivo ao cargo da comisión durante catro décadas.
Para o Concello e a Corporación “a dimensión que hoxe teñen as festas, declaradas de Interese Turístico de Galicia, é o resultado de moitos anos de traballo que nos deixaron, ademais, momentos tan icónicos e recoñecidos en todo o país como o é a cantata do último día”.
A súa figura é tan popular e tan querida en Rianxo, que xa forma parte da cultura viva do lugar e se reflicte en frases tradicionais do pobo como “que bote ou Xixí!” durante os festexos.
