A Consellería do Mar, a través de Portos de Galicia, investiu 190.000 euros na renovación da cuberta do edificio da lonxa de Portocubelo, no concello de Carnota. Así o trasladou este mércores 26 de agosto a conselleira, Marta Villaverde, nunha visita ao edificio para comprobar os traballos executados.
Villaverde explicou que esta actuación “permite garantir a estanquidade interior do inmoble e mellora o seu illamento” e cunha solución técnica que “garante tamén unha ancoraxe específica para as placas solares das que dispón o edificio de modo que se mantén a súa actividade enerxética”. Ademais, destacou que “as obras mantiveron a imaxe orixinal do conxunto do edificio, de destacado valor arquitectónico”.
Salientou ademais que os traballos desenvolvéronse compatibilizando a obra co normal funcionamento da lonxa, de modo que non se viu interrompida a súa actividade. Ademais, a solución adoptada garante un mellor resultado e durabilidade en contornas mariñas de alta salinidade.
Con esta actuación, engadiu a conselleira, “melloramos as condicións de traballo dos profesionais que operan na lonxa de Portocubelo e damos resposta a unha demanda da confraría de pescadores de Lira, cuxa lonxa amosou en 2025 unha destacada recuperación na súa facturación e actividade”.
